Сите 20 членови на екипажот на турскиот воен транспортен авион Ц-130 загинаа во авионската несреќа на границата меѓу Грузија и Азербејџан, објави денес Турција.
Авионот Ц-130 полета од Азербејџан и се враќаше во Турција кога се урна, соопшти турското Министерство за одбрана на мрежата X, пренесува Usornnews.
Турскиот претседател Реџеп Таип Ердоган изрази „длабока тага“ и сочувство до семејствата на жртвите.
– Со Божја волја, ќе ги надминеме овие проблеми. Во нашите молитви сме со нашите маченици – рече Ердоган.
Азербејџанскиот претседател Илхам Алиев, исто така, му упати сочувство на Ердоган, нарекувајќи ја несреќата „трагична загуба на војници“ и изразувајќи солидарност во овој момент на болка.
Грузиското Министерство за внатрешни работи објави дека авионот се урнал во општината Сигнаги, во близина на границата со Азербејџан, и дека е започната истрага.
C-130 Херкулес, произведен од американската компанија „Локид Мартин“, има четири мотори и е наменет за воени транспортни задачи.
Авионот е дизајниран за слетување и полетување од неподготвени или полуподготвени писти, а се користи за транспорт на воен товар, војници и евакуација.