Српскиот претседател Александар Вучиќ утре во периодот од 18 до 20 часот ќе и се обрати на јавноста за кризата во Украина и ќе го презентира ставот на Србија по тоа прашање, јави дописникот на МИА од Белград.
Како што соопштија медиумите во тек се консултации на претседателот на Србија со многу претседатели и премиери ширум светот, за да може Србија да ги донесе најдобрите одлуки во согласност со сопствените национални интереси.
Србија подготвува и прецизен документ во кој ќе се дефинираат позициите и политиките на Белград.
Претходно денеска се одржа седница на Советот за национална безбедност на која се расправаше за состојбите во регионот и Украина, а нова седница на тоа тело ќе се одржи и утре во 16 часот.
Во Палатата Србија во тек е седница на Владата на Србија на која присуствува и претседателот Александар Вучиќ.
Вучиќ во текот на претпладнето разговараше и со амбасадорите на Квинта и со шефот на Делегацијата на ЕУ во Србија, а по таа средба беше констатирано дека сите информации за позициите искажани од присутните на таа средба ќе бидат објавени во следните 36 часови.
Извор: МИА