Српскиот претседател Александар Вучиќ денеска им се обрати на граѓаните на Србија. Вучиќ изјави дека најважно е што Србија победи по вчерашниот протест.
– Дека Србија не застана, покажуваат и бројни факти. Во наредните денови ќе ја отвориме делницата кај Пожега. Со тоа ќе се завршат 610 километри од автопатот. Со гордост можам да кажам дека времето откако сме заедно на власт е време во кое изградивме пет пати повеќе автопати и експресни патишта отколку во кој било друг период по Втората светска војна. Возот до Суботица ќе биде пуштен во сообраќај кон крајот на август. Ќе стигнете до Суботица за еден час, а до Нови Сад за половина час. Не престанавме да носиме инвестиции и покрај бројните проблеми. Во наредните денови ќе отворам фабрика во западна Србија. До крајот на годината ќе отвориме уште две во Ниш, нагласи Вучиќ.
Србија победи и не можете да ја добиете Србија со насилство како што некои сакаа, Србија никогаш нема да запре, изјави Вучиќ на прес-конференцијата.
„Седум месеци терор се случуваат од страна на некои луѓе кои го зедоа законот во свои раце. Синоќешната објава е директен повик за граѓански судир и напад врз полицијата. Обвинителството мора да си ја заврши работата, времето за одговорност доаѓа. Нема да потпишам помилување, никаква аболиција. Ќе направам фер разлика помеѓу студентите кои јасно рекоа „да, го мразиме Вучиќ, тој е ужасен, но нема да учествуваме во насилство“. Случајно, беа избегнати најсериозните последици. Во ова учествуваа не само арогантни студенти, туку и постари луѓе кои ги поттикнуваа од лични интереси. Не беше тешко однапред да се види што ќе се случи. Ви кажав кога ќе започне насилството. Беше јасно дека ќе има насилство. Што мислеа? Дека се посилни и помоќни од државата? Дефиницијата за државата е дека има монопол врз физичката сила. Нема никој посилен од државата. Гледам дека не сте положиле многу испити. Им честитам на полицијата за нивното професионално однесување. Им честитам на директорот Васиљевиќ и членовите на сите единици што синоќа учествуваа во зачувувањето на јавниот ред и мир. Таков професионализам не сум видел никаде во Европа. Полицијата си го спаси образот синоќа повеќе од кога било. Ова не е крај на апсењата. Работиме на идентификување на лица, а на тоа работи и Агенцијата за безбедност и информации“, рече Вучиќ.
