Претседателот на Србија, Александар Вучиќ, изјави дека од ноќеска, според српско време, американските царини за српската стока, кои од август минатата година изнесуваа 35 отсто, ќе бидат нула проценти.
„Србија имаше царини и пред воведувањето на тарифите за челик, алуминиум, бакар и возила, како и остатокот од светот, но потоа беа додадени специјални тарифи од 35 проценти како одговор кон земјите што имаа трговски суфицит со САД“, изјави Вучиќ.
Тој рече дека постоеле различни толкувања за причините поради кои биле воведени овие царини.
„Мислевме дека тоа е поврзано со извозот од Европската Унија преку Србија и затоа сметавме дека ни се воведени толку високи царини. Тоа ни создаде големи проблеми. Една фабрика за муниција од Ужице 30 години извезуваше оружје“, рече Вучиќ.
„Од ноќеска, според нашето време, тарифите за Србија се 0 проценти. Во одреден период тие ќе бидат меѓу 10 и 12 проценти, но засега, додека траат преговорите, ќе бидат 0 проценти“, изјави српскиот претседател.
Тој објасни дека против Србија биле водени четири истраги.
„Првата причина беше присилната работа, втората неповолните царини, третата фармацевтската индустрија, а четвртата неповолните практики во дигиталните даноци и даночната политика. По сите тие прашања сме чисти и затоа имаме нула проценти тарифи. Ова е исклучително важна вест“, нагласи Вучиќ.
Според него, ова ќе значи подобар инвестициски и кредитен рејтинг за Србија, повеќе инвестиции и поголеми можности странските компании да ја изберат Србија како дестинација за вложување.
Тој сепак додаде дека е невозможно тарифите трајно да останат на нула проценти и дека конечната одлука ќе зависи од разговорите и преговорите.
Осврнувајќи се на разговорите околу компанијата „Лукоил“, Вучиќ изјави дека со оптимизам го очекува нивното завршување.
„Мислам дека сме блиску до конечно решение меѓу Русите, Унгарците и Србите, што повторно ќе ѝ даде голема сила на Србија за во иднина“, рече тој.
САД од 1 август минатата година воведоа царини од 35 проценти за српската стока. Мерката беше дел од поширока трговска политика кон повеќе од десет земји, а американскиот претседател Доналд Трамп тогаш порача дека царините се привремени и дека можат да бидат изменети во зависност од трговските односи.
Трамп истакна дека царините може да бидат намалени доколку Србија го отвори својот пазар за американски производи и ги отстрани трговските бариери. Додаде дека производите произведени во САД нема да бидат оптоварени со царини, а секоја злоупотреба преку реекспорт ќе биде санкционирана.