Од вчера попладне до осми септември Тирана ќе биде главен град на мирот и верската хармонија во светот. Мирот, верската толеранција и дијалогот се мотото на 28-та Меѓународна средба за мирот во чест на 20-годишнината од завршувањето на студената војна на Балканот, јави дописникот на МИА од Тирана.
Средбата, под мотото „Мир секогаш е можен“, се одржува во органзиација на заедницата Сант Егидио во соработка со албанската Влада , албанската православна и католичка црква, а учествуваат 4.000 верски старешини, политичари и други гости од целиот свет.
На овој голем собир, кого албанските медиуми го нарекуваат и „Молитва за мир 2015“ учествуваат и голем број новинари, меѓу кои и Никола Ѓурѓај, уредник на весникот на Македонците во Албанија „Илинден“.
Министерот за труд и социјални работи Бленди Клоси на високите верски претставници и учесници им посака добредојде во, како што рече, Албанија на толеранцијата.
– Добредојдовте во земјата на хармонијата меѓу религиите, во земјата на над 650 џамии, 100 теќиња и 1.100 цркви.Добредојдовме во земјата на убавите чуда, -рече Клоси.
Во своето обраќање тој се задржа и на ланската посета на папата Франциско, кој срдечно беше пречекан и од муслиманите.
– Ние веруваме дека дијалогот може да го направи мирот можен. Правото на религија е едно од основните права и ние како претставници на државата имаме одговорност да го заштитуваме. Културната разновидност е загрозена и исчезнува и во име на религијата. Во овој свет, хармонијата слична е со човек. Ние, за само две години ја поддржавме изградба на долгоочекуваната Голема џамија, ја инаугуриравме Катедралата, христијаните и муслиманите го пречекаа папата Френсиско, го финансиравме Одеонот на Бектешите, изјави Клоси.
Обраќањето тој го заврши со зборовите на Блажената Мајка Тереза „мирот почнува со една насмевка“ и на пророкот Мухамед „насмевката треба да се напише како добротворна цел“.
На собирот беше прочитано и поздравното писмо на папата Франциско, кој покрај другото Тирана ја нарече град на верски соживот.