Власта и опозицијата во Хрватска меѓусебно се обвинуваат за авторство на документот кој во Кабинетот на хрватскиот претседател Иво Јосиповиќ стигнал со наслов „Акциски план Барбика – работна верзија, строго доверливо“.
Документот содржи попис на активности со кои во претстојната претседателска кампања требало да се дискредитира кандидатот на Хрватската демократска заедница, Колинда Грабар-Китаровиќ.
Јосиповиќ вели дека станува збор за подметнување, а владејачката Социјалдемократска партија и опозициската Хрватска деморкатска заедница меѓусебно се обвинуваат за создавање на документот.
На Хрватска и претстои кампања за претседателски избори што треба да се одржат во 2015 година. Засега освен актуелниот претседател Јосиповиќ, сигурен кандидат е Колинда Грабар Китаровиќ и која во моментот е на функцијата помошник на генералниот секретар на НАТО.
Како што објави Јутарњи лист, со документот кој стигнал по пошта во Кабинетот, имало и писмо од анонимна наводно загрижена членка на владејачката СДП која тврди дека документот е напишан во СДП, за потребите на Јосиповиќ во претседателската кампања.
Во документот меѓу останатото се тврди дека би требало да се пласира дека Грабар-Китаровиќ лажира истражувања на јавно мислење, детали од нејзиниот личен живот, детали за имотот, наводни љубовни афери…а, како најголемо „откритие“ е дека татко и бил партизан.
Би требало, како што се препорачува, противкандидатката на Јосиповиќ да се нарекува Барбика, па дури и да се објавуваат карикатури со Барбика која игра „ужичко коло“. Претседателот Јосиповиќ вели дека тоа е подметнување од параразузнувачко подземје.