Рускиот министер за надворешни работи Сергеј Лавров даде долго интервју за Радио-телевизија на Република Српска. Тој му порача на Западот дека неговата политика за проширување на НАТО ќе заврши лошо, а потоа зборуваше и за ситуацијата на Балканот.
Тој ги повтори тврдењата дека Западот се обидува незаконски да ги охрабри активностите на Сараево за донесување на надворешно-политички одлуки без да ги земе предвид ставовите на Република Српска и дека тоа е најгрубото кршење на Дејтонскиот договор.
„Ставот на БиХ, се разбира, е важен само ако се потпира на дејтонските принципи, во кои се наведува дека сите одлуки се носат само со согласност на двата ентитета и трите конститутивни народи. Она што Западот се обидува да го направи сега е незаконски да ги охрабри активностите на Сараево да донесува одлуки за надворешната политика без да го земе предвид мислењето на Република Српска – тоа е најгрубото кршење на Дејтон“, рече Лавров.
Тој додаде дека „Западот прави сè, во рамките на така-наречените реформи на бирачкиот процес, за да ги натера Хрватите да прифатат дека, како и претходно, во заедничките институции на БиХ ќе бидат претставени од Бошњаци или луѓе кои целосно политички се согласуваат со Бошњаците“.