Големиот шумски пожар, кој пред четири дена избувна во Попово Поле на територијата на Федерацијата Босна и Херцеговина, се прошири и кон подрачјето на Требиње во Република Српска, при што огнената линија долга околу пет километри се доближи до селата Седлари, Грмљани и Полице.
Командирот на Територијалната противпожарна единица, Дејан Кашиковиќ, изјави дека ноќта била исклучително тешка и исцрпувачка, но благодарение на брзата реакција на пожарникарите, сите станбени и помошни објекти биле одбранети.
„Успеавме да ги заштитиме сите објекти во трите села, како и патната комуникација. Во утринските часови пожарот нагло се засили во реонот на Горни Грмљани, поради што веднаш беа ангажирани сите расположливи сили за да се спречи неговото понатамошно ширење“, изјави Кашиковиќ.
Според него, состојбата и понатаму е исклучително сериозна и непредвидлива, а пожарот дополнително го отежнуваат високите температури и ветерот, кои придонесуваат огнот брзо да се шири.
Поради опасноста, пожарникарите упатија итен апел до сите сопственици на куќи, викендички и имоти во загрозеното подрачје да се вклучат во акцијата за гаснење и заштита на своите домови.
Екипите и натаму се на терен и вложуваат максимални напори да го стават пожарот под контрола и да спречат негово проширување кон населените места.