Турција вчера соопшти дека нема да му плати 123 милиони долари отшета на Кипар, што и беше наложено од Европскиот суд за човекови права поради инвазијата во 1974 година врз медитеранскиот остров, кој отогаш е поделен меѓу турската и грчката заедница.
Анкара ја отфрли вчерашната пресуда на Судот. Шефот на турската дипломатија Ахмед Давутоглу пресудата ја нарече неправедна и истакна дека со неа Турција е единствениот виновник за поделбата на Кипар.
Тој додаде дека одлуката на Европскиот суд не е задолжителна, бидејќи Турција правно не ја признава кипарската Влада.
– Веруваме дека одлуката претставува најголем удар врз процесот за пронаоѓање сеопфатно решение. Ова одлука не ја сметаме за обврзувачка поради основите на кои се темели, методологијата и фактот дека ја зема предвид земјата, која Турција не ја признава. Сметаме дека не е неопходно да ја извршиме оваа уплата, изјави Давутоглу.
Турција во 1974 година изврши инвазија на Кипар, по државниот удар на приврзаниците за обединување со Грција и островот оттогаш е поделен.