Граѓаните на Србија ќе ги исплаќаат долговите на Јосип Броз Тито уште 22 години. Последните кредити од 70-ите и 80-ите години на минатиот век доспеваат во 2031 и 2041 година, а вкупната сума е поголема од 1,7 милијарди евра, објави српскиот весник „Блиц“.
Србија најмногу му должи на Парискиот клуб на доверители кај кого пред четири децении републиката се задолжила за 4 милијарди евра. На второ место е Светска банка, односно нејзиниот огранок ИБРД, кој ѝ одобрил заем на Србија од 1,8 милијарди евра, а земјата им должи и на Кина и Кувајт.
Од Народната банка на Србија за „Блиц“ потврдиле дека дел од долговите ќе се отплаќаат уште 22 години. Последната рата за кредитот од Кина земен во 1999 година доспева за две години, а кредитот кој во 1989 година бил земен од Кувајт ќе биде исплаќан уште 15 години.
Министерот за финансии Синиша Мали изјавил дека Србија уредно ги отплаќа кредитите.
Од друга страна, пишува „Блиц“, за разлика од Србите, Хрватите и Словенците ги исплатиле долговите од времето на Тито. Последниот долар Хрватите на Парискиот и Лондонскиот кулб го исплатиле пред 10 години. Од Парискиот клуб бил земен кредит од 192 милиони евра, а од Лондонскиот 78 милиони евра.