Турскиот сојуз на архитекти и инженери, кој беше ангажиран во протестите против уривањето на паркот Гези, денеска ја обвини владејачката Партија на правдата и развојот (АКП) на премиерот Реџеп Тајип Ердоган за „лов на вештерки“, откако беше усвоен Законот со кој се намалуваат овластувањата на Сојузот.
Сојузот на коморите на архитекти и инженери (ТММОБ), каде членуваат 423.000 експерти, ќе го изгуби правото за одобрување на урбанистички проекти, откако АКП во текот на неделата го „протурка“ законот.
– АКП го усвои законот со цел да го ослабне Сојузот. Нема сомнеж дека овој закон е директно поврзан со движењето за зачувување на паркот Гези. Со тоа владејачката партија се обидува да го натера ТММОБ да ја плати цената за тоа што се случи и почна лов на вештерки, за да создаде некаква илегална организација, која лесно може да се обвини за општонационалниот протест, истакна претседателот на ТММОБ, Мехмет Соганци.