Наставници од Турција, членови на синдикати организираа денеска еднодневен штрајк против политиката на Владата во сферата на образованието и назначувањето директори, јавија турски медиуми.
Во Синоп, северна Турција, полицијата употреби солзавец во момент кога демонстрантите сакаа да прочитаат порака до Градското собрание. Една жена притоа е повредена додека голем број наставници побарале лекарска помош откако биле фрлени солзавци врз нив.
Тие бараа да се стави крај на „политичките мерки во образовниот систем и на задолжителната ротација на наставници и директори“.
Мехмет Емин Каршаноглу одговорен претставник од еден од двата синдиката изјави дека трева да бидат укинати сите пречки пред „демократското, научно и секуларно образование на мајчин јазик и на сите образовни степени да постои образование не според религиозни туку според научни правила“.
Откако во 2002 година на власт дојде Партијата за правда и развој во Турција има „бум“ на средни религиозни училишта. Според анализи, бројот на такви училишта е зголемен за 73 отсто во изминатите пет години и денес во државата има 936 такви училишта.