Претседателот на Европскиот совет Херман Ван Ромпуј изјави денеска дека лидерите на европските држави и влади одлучиле пристапните преговори со Србија да започнат најдоцна во јануари 2014 година, што според него е историски момент за Балканот и Европа.
– Оваа одлука, како и одлуката за започнување преговори со Косово за Договорот за стабилизација и асоцијација, е директна последица на храбриот договор меѓу Белград и Приштина постигнат во април, истакна Ромпуј на прес-конференција во Брисел.
Во јануари, како што е прецизирано, ќе се одржи меѓувладина конференција со Србија, со што формално ќе се отворат преговорите за членство.
Ромпуј најави дека в понеделник ќе допатува во Белград и Приштина, со цел да се истакне значењето на овие исчекори во процесот на евроинтеграции на Србија и Косово.
Претседателот на Европската комисија Жозе Мануел Баросп, исто така, на прес- конференција ја поздрави одлуката за одредување датум за преговори со Србија, оценувајќи дека станува збор за историски настан.
– Да се потсетиме што се случуваше неодамна во овој дел на Европа, каде што беснееше војна, а сега започнуваме преговори за членство, истакна Баросо, заклучувајќи дека овој исчекор на Србија во евроинтеграциите е „демонстрација на привлечните сили кои ги има ЕУ“.