Црногорската полиција трага по рускиот државјанин Михаил Шабунин (30) под сомнение дека денеска изврши тројно убиство во Даниловград, во Црна Гора.
Телата на тројца вработени се пронајдени денеска на стрелиштето „Чешка збројовка“ во Даниловград, Црна Гора.
Се претпоставува дека Шабунин со огнено оружје ги уби Петар Глобаревиќ (24) од Подгорица, Момир Радоњиќ (67) од Даниловград и Немања Капор (20) од Подгорица, пренесува Vijesti.me.
Телата ги пронајде М.Ј., сопственикот на стрелиштето, кој ја извести дежурната служба на Одделението за безбедност во Даниловград.
Полицијата проверува дали Шабунин по убиствата побегна со возило „сеат кордоба“ со регистарски таблички PG AC 472.
Тоа возило е во сопственост на таткото на еден од убиените.
Полицијата интензивно работи на пронаоѓање и апсење на осомничениот.
Сите возила што се движат од правец на Даниловград кон Подгорица се запираат и се контролираат.