На грчкиот остров Лезбос денеска е отворен првиот прифатно-регистрациски центар за мигранти и бегалци во Грција каде тие ќе може да се регистрираат, но и да побараат азил.
Центарот гопосетија европскиот комесар за миграции Димитрис Аврамопулос, министерот за надворешни работи на Луксембург Жан Аселборн и грчкиот министер за миграции Јанис Музалас.
Аврамопулос рече дека работата на првиот таков центар ќе означува дека во целост се применува планот на ЕУ за идентификација и регистрација на бегалци.
– Тоа е важен почеток, но се уште има долг пат за да се отворат такви центри на други места, да се почне со релокација и да се подобри враќањето на илегалните мигранти, рече тој.
Аврамопулос и Аселборн истакнаа дека бегалците мора да почитуваат процедури на ЕУ според кои треба да побараат азил веднаш по доаѓањето во Грција. Лезбос е за стотици илјади бегалци од Блискиот исток прва влезна точка во Европската унија.