Лидерот на Курдската работничка партија Абдула Оџалан упати порака во врска со процесот за мирно решавање на курдското прашање. Пораката била предадена преку замениците-претседатели на парламентарната група на Партијата за мир и демократија Первид Булдан и Идрис Балукен, кои се сретнаа со лидерот на ПКК на островот Имрали, каде тој отслужува доживотна затворска казна.
Оџалан нагласи дека мировниот процес за решавање на курдскиот конфликт е од големо значење.
– Овој процес, кој го спроведуваме со големи напори, ја смири ситуацијата во општеството, големи потреси стивнаа, нагласил Оџалан и додал дека и натаму остануваат големи проблеми, кои треба да се решат.
Тој посочил дека писмено и усно ги доставил своите предлози до државата и оти го очекува нејзиниот став за почеток на содржински и длабоки преговори.
Оџалан предупредил дека преговорите мора да се продлабочат и оти тој процес не смее да се одложува.
Лидерот на курдските бунтовници повикал и за свикување на Демократски исламски конгрес во Дијарбекир, насочен против „предавниците на исламот, како што се формациите Ал Каеда и Ал Нусра“.