Хрватскиот премиер Зоран Милановиќ оцени дека Украина се распаѓа како држава, додека според него Русија, која со случувањата на Крим ја преминала црвената линија, треба да биде предупредена за натамошното однесување.
Милановиќ нагласува дека ситуацијата во Украина е многу покомплексна од што изгледа и додаде дека не може да се „појасни во две реченици“.
– Тоа е држава и нација, која постојано беше во настанување и која сега пред наши очи се распаѓа, изјави во емисијата на Хрватското радио „А сега Владата“, премиерот на најмладата членка на Европската унија и предупреди дека тој процес никој не го контролира.
Тој додаде дека за среќа Хрватска не мора да зазема радикални политички ставови, бидејќи сака да соработува со Русија, колку што е тоа можно.
– Тоа во голема мера ќе зависи од нив, така што во оваа смисла мошне ги мерам зборовите, нагласи Милановиќ.
Тој потсети и дека земјите-членки на Унијата не се единствени во однос на санкциите кон Русија.