Германската канцеларка, Ангела Меркел последниот потег на Приштина го сфатила како голема препрека за понатамошниот дел од дијалогот, пренесе српскиот весник „Блиц“, повикувајќи се на дипломатски извори.
Како што се истакнува, за време на средбата со српскиот претседател, Александар Вучиќ на церемонијата во Париз, тој инсистирал на одлуката на Приштина да ја зголеми царината на производите од Србија и Босна и Херцеговина.
„Меркел изразила разочараност од постапката на Приштина и сфатила дека овој потег е голема препрека за понатамошниот дијалог“, пишува весникот.
Изворот за „Блиц“ рекол дека Меркел се пожалила оти лидерите од регионот едно зборуваат пред неа, а сосема друго кога се враќаат во своите земји. Наводно, Меркел препознала искреност во Вучиќ за решавање на косовското прашање. Според изворот на „Блиц“ таа би сакала проблемот да биде решен додека таа е се уште активна.