Поранешниот прв човек на албанската тајна служба ШИК, Фатос Клоси, но и поранешниот министер за одбрана на Албанија, Сабит Брокај, добиваат месечна плата од косовската држава како ветеранина Ослободителната војска на Косово (ОВК).
Како што јави дописникот на МИА, двајцата високи функционери на албанската држава се дел од списокот на ветерани. Тие имаат статус на ветерани и се дел од Командата на Генералштабот на ОКВ во истата единица во која бил и поранешниот премиер на Косово и актуелен шеф на косовската дипломатија, Хашим Тачи.
Вклучувањето на Клоси и Брокај во списокот и добивањето статус на „ветерани од ОВК“, што подразбира 300 евра месечен паричен надоместок, се поврзува со нивната функција за време на војната на Косово.
Клоси беше на чело на ШИК од 1997 до 2002, додека Брокај прв човек на албанската одбара од 1997 до 1999 година кога и заврши косовската војна по интервенцијата на НАТО.
На списокот на „ветерани на ОВК“, меѓу другите, се и Али Ахмети и Нури Беџети од Тетово, кој сега живее во Приштина, потоа Агим Чеку, Хашим Тачи, Јакуп Красниќи и Фатмир Лимај.