Хрватскиот министер за воени ветерани Предраг Матиќ денеска изјави дека секој лажен ветеран ја чини државата годишно околу еден милион евра.
– Сите кои ги користат правата од законите, а немаат право на тоа, односно кога ќе се соберат сите пензии кои ќе ги добијат, станбеното згрижување и сите други бенефиции, сметката е едноставна. Грубо пресметано тоа е еден милион евра, истакна Матиќ по владината седница.
Меѓутоа, министерот одбил да каже колку лажни ветерани се пријавени по објавувањето на Регистарот на хрватски ветерани од војната во 90-тите.
– Не сакам да зборувам за бројки. Околу тоа нема ништо спектакуларно. Беа потребни години за да се стекне политичка воља и тој регистар конечно да се објави, а сега институциите нека си ја вршат својата работа, порача хрватскиот министер.