Гласачките места во Косово се затворени по одржувањето на вонредните парламентарни избори, а според првичните излезни анкети најмногу гласови освои движењето „Самоопределување“ на актуелниот премиер Албин Курти.
Според проекциите објавени по затворањето на избирачките места, „Самоопределување“ добило околу 42,3 отсто од гласовите. На второ место е Демократската партија на Косово (ПДК) со 21,6 проценти, додека Демократскиот сојуз на Косово (ЛДК) освоил околу 17,3 проценти.
Станува збор за неофицијални резултати добиени преку анкетирање на гласачите веднаш по гласањето, па конечниот изборен резултат може да се разликува по официјалното пребројување на гласовите.
Во овие проценки не се вклучени гласовите од дијаспората, кои се собираат преку дипломатско-конзуларните претставништва, како и гласачките ливчиња испратени по пошта, што би можело да влијае врз конечната распределба на пратеничките мандати.
Според првичните информации на косовските медиуми, излезноста на изборите се движела меѓу 40 и 45 проценти од регистрираните гласачи. Официјалните резултати се очекуваат по завршувањето на пребројувањето од страна на Централната изборна комисија на Косово.