Комунистичката влада е виновна за ситуацијата на Кипар, изјави во интервју за грчката телевизија „Скај“ архиепископот на Кипар Хризостом.
Според него, претходниот кабинет сакал да ги направи „сите богати – сиромашни и ја постигнал целта“. Според Хризостом, сите кои ја довеле земјата до оваа ситуација треба да одговараат пред лицето на законот.
Кипарскиот архиепископ смета дека претседателот Никос Антастасиадис заминал неподготвен на седницата на Еврогрупата на 15 март на која беше одлучено Никозија да добие спасувачки заем од 10 милијарди евра, доколку претходно обезбеди 5,8 милијарди евра. За „Скај“ Хризостом вели дека притисокот на европските партнери над Анастасиадис бил неподнослив.
Во однос на намерата на Кипарската православна црвка да го стави под хипотека својот имот за да помогне во спасувањето на островот, архиепископот изјави дека „имотот на црквата е на народот, тој има право над него и кога има потреба тој му е на располагање“.