Известувачот на Европскиот парламент Јелко Кацин најави дека влезот на Хрватска во ЕУ, кој е планиран за 1 јули 2013 година, би можел да биде одложен за до крајот на следната година, па дури и за подоцна.
Тој истакна дека сепак без разлика на тоа, од 1 јануари следната година стапува во сила поинаков трговски режим, што посебно ќе се однесува на БиХ.
„Поради приближувањето или евентуалното членство на Хрватска во ЕУ, на 1 јануари 2013 година стапува во сила поинаков трговски режим. Тоа ќе доведе до големи промени во продажбата на земјоделските производи, односно производи за домашниот пазар во БиХ. Мислам дека тоа е алтернативна порака на која би требало веднаш да се реагира“, истакна Кацин.
Претседателот на Долниот дом на германскиот Бундестаг Норберт Ламерт од своја страна изјави дека Хрватска не е подготвена да се приклучи во ЕУ и дека политиката на проширување ќе биде одложена. Тој нагласи дека по лошите искуства со членството на Бугарија и Романија, не верува дека Хрватска е подготвена да стане членка на Унијата.