Турскиот претседател Реџеп Таип Ердоган изјави дека Израел е предводен од мрежа која се смета себеси за супериорна во однос на другите и дека постепено и свесно го влече регионот кон целосна катастрофа.
Зборувајќи на ифтар во претседателскиот комплекс во Анкара, Ердоган се осврна на ширењето на конфликтот низ целиот Блиски Исток, предупредувајќи на скриените мотиви за ваквите дејствија.
„Сите добро знаеме дека нападите што прво беа насочени кон Газа, потоа Јемен и Либан, а неодамна и кон Иран, не беа мотивирани само од безбедносни причини“, истакна турскиот лидер.
Ердоган нагласи дека глобалниот систем, изграден особено по Втората светска војна, е во фаза на историски прекин и дека фактите за настаните на Блискиот Исток мора јасно и недвосмислено да се соопштат на светската јавност.
Турскиот претседател остро ги осуди дејствијата на израелските власти во Ерусалим, истакнувајќи дека Израел произволно и без никаква правна основа ја држел џамијата Ал-Акса затворена за муслиманските верници 17 дена. Тој додаде дека паралелното ширење на наративот за „ветената земја“ и „апокалиптичните сценарија“ воопшто не било случајно, туку свесно дизајнирано.
„Од клучно значење е да се ослободиме од наметнатите агенди и да му ги објасниме на светот овие реалности, ова варварство и состојба на лудило на начин што ќе остави силен белег“, рече Ердоган.