Европската комисија го усвои пролетниот извештај во чии заклучоци препорачува отворање на претпристапни преговори со Црна Гора, пренесе црногорската национална телевизија.
Во извештајот се констатира дека официјална Подгорица добро работела на исполнувањето на критериумите, што и биле зададени за започнување на преговорите со Европската унија.
Црна Гора напредувала во областа на владеењето на правото, вклучително и борбата против организираниот криминал и корупцијата, со што ги исполни условите за отпочнување на процесот на преговорите, се оценува во заклучокот на ЕК.
За пролетниот извештај на ЕК, најнапред ќе расправаат министрите за надворешни работи на членките на ЕУ на 26. јуни, по што документот три дена подоцна ќе се најде пред Самитот на ЕУ.
Доколку Самитот го усвои извештајот, тоа практично ќе значи отворање на претпристапните преговори со Црна Гора. Одлуката се донесува со консензус на членките на ЕУ.