Во случај Косово да формира свои вооружени сили, косовските Срби, исто така, може да формираат своја армија, изјави за српската државна телевизија РТС поранешниот претседател на српската парламентарна комисија за Косово, Милован Дрецун.
Дрецун оцени дека законот за трансформирање на Косовските безбедносни сили во Вооружени сили на Косово, што денеска треба да го разгледува Парламентот во Приштина, е „дискриминирачки закон, што на Србите им ја наметнува волјата на албанската страна“.
Тој додаде дека е неопходно да се создадат услови Србите и останатите неалбански заедници да се чувствуваат безбедни во Косово, оценувајќи дека формирањето на вооружени сили ќе предизвика вознемиреност кај српскиот народ.
– Овие Вооружени сили ќе бидат наследник на терористичката Ослободителна војска на Косово (ОВК), што беше претворена во Косовски заштитен корпус, што потоа беше преименуван во некакви Косовски безбедносни сили и сега се формира некаква армија, што е непотребна и ја дестабилизира, место да ја стабилизира ситуацијата, рече Дрецун.