Шефот на турската дипломатија Ахмет Давутоглу денеска ја потврди информацијата на џихадистичката група Исламска држава во Ирак и Левантот, дека 32 турски возачи на камиони, кои беа киднапирани минатиот месец во Северен Ирак, се ослободени.
– Синоќа ние добивме добра вест за киднапираните возачи. Пред 15-20 минути нашиот генерален конзул ги пресретна киднапираните и ги упати кон Ербил. Ниовната здравствена состојба е добра. Можно е некој од нив да има потреба од медицинска помош, истакна Давутоглу.
Тој наведе дека од Истанбул за Ербил ќе замине авион, с кој возачите ќе пристигнат во Анкара.
Турските возачи беа киднапирани од ИДИЛ на 10 јуни, додека патувале кон Мосул. Припадниците на ИДИЛ ги ослободија возачите но не и камионите кои превезувале мазут.
Во заложништво на ИДИЛ остануваат уште 49 луѓе, кои се во Турскиот конзулат во Мосул, меѓу кои и генералниот конзул, како и деца. Тие се киднапирани по упадот во Конзулатот на 11 јуни.