Четворица хрватски инвалиди од војната, кои веќе седми ден протестираат во кампот под шатори пред зградата на Министерството за ветерани, изминатата ноќ беа префрлени во болница, соопшти хрватскиот портал Индекс.
-Луѓето се уморни, истоштени и измрзнати и не е чудно што се појави потреба да бидат однесени со брза помош, рече Мирко Љубичиќ, еден од организаторите на протестот.
Тој изјави дека и покрај заморот ветераните ќе го продолжат протестот со барање за оставка на министерот за семејства, ветерани и солидарност меѓу генерациите, Предраг Матиќ, и за прифаќање на новиот закон за правата на ветераните, што треба да биде подготвен со учество на нивни претставници.
Протестот на ветераните почна во знак на незадоволство од плановите за ограничување на нивните права и прерасна во бунт, чија кулминација беше смртта на инвалидот од војната Невенка Топалушиќ, мајка на четири деца,за време на протестот.
Барањата на демонстрантите беа поддржани од илјадници ветерани во цела земја.