Германската канцеларка Ангела Меркел и турскиот премиер Ахмет Давутоглу апелираат за создавање на безбедни мигрантски маршрути кон Европа и за поголема улога на НАТО во борба против илегалната трговија со луѓе, јави ДПА.
– Сакаме да обезбедиме безбедни маршрути, легални маршрути (за беглаците), истакна Меркел.
Таа и Давутоглу наведоа дека планираат заеднички операции меѓу европската гранична агенција ФРОНТЕКС и турската крајбрежна стража со цел да се стави крај на илегалната имиграција.
– Ние се договоривме за борба против кријумчарењето на луѓе, истакна Давутоглу.
Тој додаде дека в четврток ќе се одржи седница на министрите за одбрана на земјите-членки на НАТО, во чии рамки „Турција и Германија планираат да иницираат разгледување на проблемот со бегалците со цел вклучување на Алијансата во тој проблем“.
– Исто така ние заедно ќе се заложиме набљудувачките и контролирачките механизми на НАТО ефикасно да бидат искористени на границата (меѓу Турција и Сирија) и во Егејско Море, наведе Давутоглу.