Албанскиот премиер Сали Бериша изјави дека никој не треба да стравува од албанскиот национализам, „кој е инспириран од демократските вредности и слободата“.
– Иако од крајот на минатиот век досега минуваме преку најжестоки националистички бури, албанскиот национализам е најцивилизираниот и е инспириран единствено од слободата, истакна Бериша на новинарскиот новогодишен прием.
Премиерот го истакна придонесот на медиумите, кои „фрлиле светлина врз историската вистина“ и изрази увереност дека тие на истиот начин ќе го популаризираат и процесот на обединување на Албанците, како и нивното обединување со Европа.
Бериша ги пофали медиумите, нарекувајќи ги „фактички најдобрата опозиција“ во текот на вториот мандат на десноцентристичката Влада, како и „највреден имот во земјата во контекст на развојот на демократијата“.