„Секој обид да се загрози територијалниот интегритет на Босна и Херцеговина ќе има сериозни последици“, е пораката што ја објави американската амбасада во Сараево како одговор на повторените закани на лидерот на босанските Срби Милорад Додик дека Република Српска ќе се отцепи од држава во која е дел.
„Секое дејство што би било преземено во насока на распуштање на Босна и Херцеговина би било кршење на Дејтон и би имало сериозни последици“, се вели во објавата на американската амбасада на Твитер.
Се наведува и дека САД се цврсто решени да ја поддржат БиХ како демократска, мултиетничка, суверена и независна држава со несомнен територијален интегритет, потсетувајќи дека ниту Дејтонскиот договор ниту уставот на БиХ не им даваат право на нејзините ентитети да се отцепат.
Реакцијата на американската амбасада дојде откако Додик на големиот собир на неговите приврзаници, одржан во вторникот во Бања Лука, повторно се закани со отцепување на РС доколку не се вратат сите овластувања кои беа префрлени на државно ниво во изминатите години.
„Ќе одиме безбедно, но еден ден ќе заземеме 49 проценти територија на Босна и Херцеговина. А кога ќе земеме… Верувам во идеалот за независна Република Српска“, рече тогаш Додик.