Највисокото исламско тело во Дубаи соопшти денеска дека кражбата на безжичен интернет од соседите не е во согласност со учењето на Исламот.
Одделот за исламски прашања и хуманитарни активности на Дубаи на својот сајт објави ваквиот верски указ, кој во Исламот се нарекува фатва, како одговор на прашање на еден анонимен граѓанин.
– Не е ништо лошо да го користите безжичниот интернет на соседите ако тие ви го дозволат тоа, но ако не ви дозволат не смеете да го користите, се наведува во указот.
Одделот за исламски прашања и хуманитарни активности на Дубаи на својот сајт одговара на различни прашања поставени преку интернет, објавува молитви и верски учења, а третира и модерни теми, како што се козметички операции или илегално преземање филмови.