Екипата на Народниот музеј од Велес ги заврши археолошките истражувања на локалитетот Кале/Градиште попозната како населба Гурбита, во близина на село Згрополци, што ги вршеше со финансиска поддршка од Министерството за култура од програмата за истражувања за 2014 година.
Како што за МИА појасни археологот Анита Василкова Мидоска раководител на истражувањето,во текот на истражувањето се работело на два сектора: на просторот на населбата и на просторот на некрополата.
– На просторот на населбата беа откриени два станбени објекти со неколку фази на реконструирање и според движните наоди се откри дека потекнуваат од 1 до 3 век од новата ера,потенцира Василкова Мидоска.
Таа посочи дека на просторот на некрополата го истражувале просторот кој бил нападнат од таканаречените диви копачи,кои на овој локалитет вршеле илегални дејствија. Така, екипата на Народниот музеј во текот на овие истражувања на некрополата откриле неколку гробови,а кои според наодите во нив и гробните прилози припаѓаат на 2 и 3 век од новата ера.
И во двата дела од населбата Гурбита, информира Василкова Мидоска, бил пронајден богат движен наод, односно керамички садови и предмети од метал. Според неа, животот во овааа богата населба Гурбита во 3 век од нашата ера почнал да замира.
Таа вели дека во наредниот педиод ќе работи на конзервација на наодите кои понатаму сака и да ги презентира пред јавноста. Археолот Василкова Мидовска очекува да добие финансиска поддршка од Министерството за култура, а истражувањето на оваа населба да продолжи и наредното лето, а се’ со цел да се добие поцелосна слика за населбата Гурбита односно за сакралниот и секојдневен начин на живеење на жителите од оваа античка населба.