За три месеци треба да биде донесен посебен закон за заштита од психичко вознемирување на работното место или популарно нарачен мобинг, што ќе важи и за јавниот и за приватниот сектор.
Таква одлука донела Владата, на иницијатива на Сојзуот на синдикатите на Македонија, информира денеска на прес-конференција владиниот портпарол Александар Ѓорѓиев.
Основа за изработка на законот ќе бидат предлозите од синдикатите, преку дебата што ќе ја координира Министерството за труд и социјална политика, со активна улога и на Организиацијата на работодавачи и преземање на најдобрите практики од Европската унија. Во законот ќе бидат содржани и разработени и постоечкиите законски норми што го третираат мобингот во Законот за работни односи. Нивното предвидување, според Ѓорѓиоев, се покажало позитивно, ја постигнале целта за анимација и заштита во изминатиот период од 2009 година и е оценето оти е потребно унапредување на областа.
– Правењето посебен закон има цел сеопфатно уредување на материјата, во секој поглед и аспект, како и да даде политичка тежина на вниманието што го има оваа материја од Владата, наведе Ѓорѓиев.
Тој информира дека со законот ќе се предвиди квалификацијата на делото психичко вознемирување на работно место и случаите кога се цени дека е извршен мобинг. Ќе има и санкциски одредби за вршење мобинг, ќе биде претставено правото на заштита и процесот за реализација на тоа право, а ќе се дефинира и ограничи злоупотребата на законот за несоодветно пријавување.
Според Ѓорѓиев, Владата очекува со законот за заштита од мобинг значително да се унапреди областа на работните односи во Македонија.
– Тоа ќе овозможи поголема заштита, но и поголема мотивација на работникот за работа, за креација и продуктивност. Со законот ќе се постигне хармонија во дејствувањето на работодавачот и работникот, но и на самите работници меѓусебно, во насока на остварување на заедничките цели и интерес, рече портпаролот на Владата.
Од 2009 година, откако со посебни одредби во Законот за работни односи е предвидено правото за заштита од мобинг, се пријавени 30 случаи на мобинг. Тоа се постапки отворени пред Комисијата за заштита од дискриминација, а многу помалку побарале судска заштита.
Одговарајќи на новинарски прашања Ѓорѓиев истакна дека Владата во овој момент не размислува за зголемување на старосната граница за пензионирање.