Премиерот Зоран Заев, по завршувањето на средбата со Биљал Касами, одговарајќи на новинарско прашање, за новите скандали со непотизам изјави дека не гледа дека има кршење на одреден закон при вработувањето на членовите на семејствата на функционерите.
Заев вели дека и тие биле граѓани на оваа држава, така што сите требале да имаат еднаков пристап до вработување.
„Реков ако некаде е прекршен закон или правна процедура ќе има одговорност. Не верувам дека членовите на семејствата на функционерите се примени на работа надвор од законот, немам таков доказ. Се работи за етички однос и ги поздравувам одлуките на функционерите кои имаа етички пристап. Од друга страна немаме намера да одиме во крајност, треба да го гледаме граѓанинот, како личност, бидејќи пред законот секој има еднаков пристап до работа во оваа земја. Не гледам никаква одговорност, Кирацовски е пратеник и секретар на партијата, секогаш бил транспарентен и секогаш постапувал одговорно во носење одлуки“, рече Заев.
Пред само неколку дена премиерот Заев јавно ги повика функционерите кои имаат вработени роднини во државна служба да покажат морална одговорност и да ги повлечат од работните места. Дел од нив, ги повлекоа, дел изјавија дека не чувствуваат одговорност и не се одзваа на неговиот повик.
Габриела Димковиќ-Мишевска