Претседателот на Социјалдемократскиот Сојуз на Македонија, Зоран Заев, денеска упати честитка до граѓаните по повод 24 мај – Денот на сесловенските просветители Св. Кирил и Методиј.
„Во мое лично име и во името на Социјалдемократскиот Сојуз на Македонија, упатувам искрени честитки по повод овој голем ден со желби за понатамошен успех во промоцијата на македонската посебност, традиција и култура.
Браќата Кирил и Методиј дадоа огромен цивилизациски придонес не само за македонскиот, туку и за сите словенски народи. Поставувањето на темелите на писменоста на македонскиот и на останатите словенски народи, како основно културно обележје, е само дел од придобивките со кои нè задолжија.
Со благородната мисија Кирил и Методиј обединија многу народи. На македонскиот народ, преку писменоста, му овозможија дополнителен влог во промоцијата на сопствената историја, култура и традиција.
Нека ни е честит денот на сесловенските просветители.“