Лидерот на социјалдемократите, Зоран Заев, повторно куртули од заканата да биде приведен и насила донесен на судењето по предметот „Пуч“, откако судијката Љубинка Башевска, го презакажа рочиштето за 21-ви декември. Со тоа и се остава време на специјалната јавна обвинителка, Катица Јанева, да одлучи дали има надлежност врз овој предмет кој е веќе доставен на разгледување во ова обвинителство. Доколку се утврди дека Јанева има стварна надлежност, „Пуч“ ќе се врати во истражна постапка.
Нема образложение за одлуката на Башевска да го презакаже рочиштето. Првично требаше да се одржи на 2-ри декември, но беше одложено поради акцијата „Ден на дрвото“ поради која денот беше неработен. Сите судења од тој ден ќе се одржат оваа сабота кога ќе се обработува, но не и судењето за „Пуч“.
На претходните рочишта судијката тврдеше дека нема да се управува од гласини или изјави дадени преку медиумите и најави дена на следното рочиште ќе побара Заев да биде стражарно приведен и донесен, затоа што не се одѕиваше на претходните покани на судот изјавувајќи дека не го признава.
Обвинителниот акт во овој случај ги терети обвинетите за кривични дела како шпионажа, злосторничко здружување и насилство врз највисоки државни функционери. Освен Заев, обвинети се и поранешниот прв разузнавач, Зоран Верушевски, како и неговата сопруга.
Маја Васева