Премиерот Зоран Заев на прес-конференција во Владата го претстави предлог планот за одлучна акција против ширењето дезинформации.
Заев најави безбедносни и проактивни мерки, воведување безбедносни протоколи за комуникација со институциите, за безбедно комуницирање преку интернет и електронска пошта, зајакнување на внатрешната ИТ инфраструктура.
Заев рече дека поради тоа, сега користи нов телефонски број со поголема безбедност.
Премиерот рече дека ќе биде нова стратегија за транспарентност, ќе бидат објавени официјални одговори на прашања на медиуми и граѓани за да се спречи извртување на официјалните ставови на Владата.
Владата, како што кажа Заев ќе формира акциска група против дезинформации која ќе ја координира министерот Роберт Поповски, а одговорен ќе биде посебниот советник за односи со јавност, Марјан Забрчанец.
Ќе биде спроведувана кампања од јавен интерес за штетното влијание на дезинформациите, а Владата ќе прави и внатрешна кампања за вработените.
Владата ќе креира и национална стратегија за медиумска писменост.