На денешната средба во Министерството за култура на која присуствувале, министерката за култура, Елизабета Канческа-Милевска, министерката за информатичко општество и администрација, Марта Арсовска Томовска и претседателите на здруженијата за заштита на авторски музички права е договорено ЗАМП да ја стави во мирување забраната за емитување авторски музички дела до 20 јануари 2016 година. Исто така, ЗАМП прифатиле за ова да ги известат странските организации за колективно управување со авторските музички права (ХДСЗАМП- Хрватска и СОКОЈ – Србија), како и радио телевизиски организации во Република Македонија.
„На состанокот е договорено: Почнувајќи од 04.01.2016-та година во рок од 15 дена работни групи составени од претставници на Министерство за култура, Министерството за информатичко општество и администрација и на здруженијата за заштита на авторски музички права, да работат на утврдување на текстот на законот за изменување и дополнување на Законот за авторскот право и сродните права, предложен од страна на здруженијата“, соопштува Министерството за култура.