Крв, игли, шприцеви, медицински отпад измешан со обичен комунален отпад е скандалозната глетка на Клиничкиот центар пред неколку дена. „Макфакс“ дојде до видео на кое се гледа дека комуналните работници со камион на „Дрисла“ без соодветна опрема, маски и ракавици и со несоодветни камиони за ваков тип на отпад го собираат ѓубрето каде што има жолти кеси со назнака „медицински отпад“, а тој се фрла во истите контејнери со преостанатиот смет. Додека комуналците го собираат ѓубрето, на земјата има остатоци од крв, а тие со обични метли ги собираат шприцевите, иглите и крвавите материјали помешани со храна.
Ова е надвор од процедурите, кои предвидуваат дека медицинскиот отпад исклучиво треба да биде одделен од комуналниот отпад. Собирањето на медицинскиот отпад исто така треба да се врши независно и одделно од комуналниот.
Ова ѓубре завршило на депонијата каде што според наши информации печката за согорување на медицинскиот отпад не работи веќе половина година и истото се депонира во специјален ров каде што се чува додека печката повторно не проработи. Во ровот наводно се депонира медицинскиот отпад но нејасно е како тој се селектира кога се собира заедно со останатиот. Од Дрисла негираат дека печката не работи веќе шест месеци, туку велат дека таа не е во функција 15 дена и дека до понеделник ќе биде поправена.
„Капацитетот на ровот што е направен е 150 кубни метри, дневно отприлика се носи по околу 10 кубни метри. Напрвивме ров за привремено складирање на медицински отпад , меѓутоа тоа е ров за отпад кој што се собира од клиниките не смее да стои подолго од 24 часа. Тој отпад го ставаме во посебен ров кој што е обложен со гел мембрана согласно регулативата за складирање ваков отпад, тоа е отпадот кој што се носи од клиниките кој што не може да чека.“ , велат од Дрисла.
Јавноста е вознемирена по низата информации кои укажуваат на несовесното работење на Дрисла и сомнежите дека отровниот скопски воздух е последица на несоодветното менаџирање со медицинскиот отпад. Активистите од „Движење за чист воздух“ утре во 12 и 5 часот организираат 15-минутна блокада на влезот на депонијата „Дрисла“.
Тие ќе бараат да се смени правилникот за извршување инспекциски надзор, усогласувајќи го со ЕУ-нормативи, во најбрз можен рок да се донесат правилници за индустриски емисии и воведување најдобри производствени пракси за тој сектор и раскинување на договорот со италијанската фирма концесионер, поради неисполнување ништо од договореното.
„Даваме рок од 15 дена за исполнување на овие барања. Во случај на неисполнување на истите, следниот чекор е блокирање на Град Скопје и поднесување тужба“, велат од движењето.
За неправилно работење досега „Дрисла“ е казнета само еднаш со 8.500 евра кога лани во јануари инспекторите утврдија дека депонијата не ги почитува протоколите за горење на медицински отпад.