Во СВР Велес утрово во 6 часот било пријавено од вработен во Македонски железници дека товорниот воз кој сообраќал на релација Гевгелија-Скопје, удрил во пешак кој се движел по железничката линија во близина на спортската сала „Гемиџии“. Пешакот починал на лице место.
Според првичните сознанија, починатиот е странски државјанин.
Како што информира на денешната прес-конференција Анита Стојковска портпарол на СВР Велес, од страна на јавен обвинител и увидна екипа на СВР Велес било излезено на лице место и бил извршен увид.
– Се работи на идентитетот на починатиот и утврдување на причините за несреќата, информира Стојковска.
Одговарајќи на новинарски прашања Стојковска информира дека кога се случил настанот на лице место велешката полиција затекнала група странски државјани кои се приведени во Полициска станица во Велес и во моментов се врши разговор со нив.
Според неа, загинатото лице не се движело со групата кои се приведени во Полициската станица во Велес, туку со други 10-20 лица, кои по ударот од возот избегале.
– Оваа втора група која е приведена во Полициската станица во Велес, не го познавала сега починатиот и затоа тешко дека ќе го утврдиме идентитетот на загинатото лице, бидејќи тоа кај себе немало документи. Ќе чекаме на откривање на идентитетот, а ако тој не биде откриен потоа и најверојатно ќе биде погребано на Новите гробишта во Велес, во гробишта наменети за непознати лица, изјави Стојковска.
Инаку, очевидци велат дека станува збор за маж на возраст од 30 до 35 години.