Викендов во Битола се одржа традиционалниот општински натпревар „Вешта жена“ на кој учесничките се натпреваруваат со свои кулинарски вештини, рецепти и уредување на трпеза.
Годинава во најтесен избор за победник на натпреварот беа Гордана Стојковска, Билјана Наумова, Андријана Петровска, Соња Богдановска и Наташа Гулабовска-Георгиевска, која го освои првото место и обезбеди учество на државниот натпревар „Вешта жена“ кој ќе се одржи на 12 мај во Тетово.
– Натпреварот беше интересен и посетен, како што тоа се случува во изминатите 22 години. Битолчанки повторно ги презентираа своите кулинарски вештини, а наградата „Вешта жена“ за 2018 година заслужено и припадна на Наташа Гулабовска-Георгиевска која своите кулинарски производи ги наслови „Барок“, информираа од организацискиот тим.
Со одлука на организаторот, за традиционалната поддршка на манифестацијата и за постигнати резултати во професијата наградени беа просветниот работник Лидија Павловска, Габриела Гулевска од секторот медицина и Цана Митровска претставничка на бизнис секторот.
