Општина Битола продолжи со асфалтирање на локалните улици, а градоначалникот Владимир Талески најави и забрзано завршување на кружните текови кај месноста „Црн Мост“ и „Веро“ во Нова Битола.
Според Талески, интезивирањето на инфраструктурните активности и посебно асфалтирањето на улиците во Битола се овозможува со активирањето на асфалтните бази во овој период од годината.
– Активно и со подготвени проекти влегуваме во новата градежна сезона. Бројката што ја ветивме за изградба на 100 улици во овој мандат најверојатно ќе биде надмината. Денеска ја асфалтираме улицата „Св. Нектариј“, инвестиција вредна околу 9 милиони денари во која се вклучени и трошоците за подземните инсталации, тротоарите и другото уредување на улицата која сега има нов лик. Во оваа градежна сезона ќе асфалтираме 25 улици, рече Талески на денешната прес-конференција.
Тој потврди дека фирмите ангажирани на кружните текови во градот забрзано ги вршат своите активности и наскоро ќе биде асфалтиран кружниот тек во Нова Битола, а на улицата „Васко Карангелски“ ќе почне изградба на нов кружен тек. На кружниот тек кај месноста „Црн Мост“ ќе биде отворена уште една пристапна улица, а стариот мост ќе биде затворен за сообраќај и ќе го користат само пешаците.