Владата предводена од ВМРО-ДПМНЕ во периодот 2006-2016 го преполови бројот на корисници на социјална помош, во голема мера поради отворањето нови работни места и спроведување на мерки за вработување на лица во социјален ризик – работи кои за СДСМ биле и се научна фантастика, се вели во реакцијата на ВМРО-ДПМНЕ на прес-конференцијата на Мила Царовска од СДСМ.
– Колку и да лаже, СДСМ не може да побегне од фактот дека просечната социјална парична помош во 2006 изнесувала 2.900 денари, а во 2016 изнесува 4.927 денари, односно е повисока за 68% во споредба со времето на владеење на СДСМ. Постојаната парична помош во истиот период е зголемена за 68,5%, стои во реакцијата на ВМРО-ДПМНЕ.
Воедно, меѓу многуте мерки, се посочуваат отпишаните долгови за социјално ранливите категории, одонсо дека 14.000 граѓани добија отпис на долгови во вкупна вредност од 1.798.493.393 денари.
– Врв на лицемерие е Мила Царовска да се појавува меѓу граѓаните од ранливите категории на кои ВМРО-ДПМНЕ им ја зголемува помошта, додека шефовите на Царовска, мултимиионерите кои го раководат СДСМ, одмараат на своите луксузни хациенди и јахти, планирајќи како можат да ги злоупотребуваат ранливите категории во обид да приграбат некој ситен политички поен, или да ги блокираат проектите кои се од нивна полза затоа што се дело на ВМРО-ДПМНЕ. Оваа бесрамна тактика на СДСМ е добро позната и прочитана од граѓаните, се наведува во соопштението.
Според ВМРО-ДПМНЕ, никој не им верува на СДСМ на кои граѓаните ќе им ја врачат заслужената казна на првите наредни избори.