Тврдењата на СДСМ дека по завршувањето на рокот за пријавувањето на спорните гласачи, се потврдиле нивните и тезите на опозицијата, дека во Република Македонија има фантомски гласачи, за ВМРО-ДПМНЕ се резултат на стравот од соочувањето со граѓаните на избори, кој, како што велат од партијата, не може да се покрие со нити една нивна лага.
Според ВМРО-ДПМНЕ очајно изгледа лицитирањето со бројки, од страна на раководството на СДСМ за бројот на „фантоми”.
– Десет години по ред разликата меѓу ВМРО-ДПМНЕ и СДСМ е околу 200.000 гласови и СДСМ многу добро знае дека не ја уживаат поддршката кај граѓаните. Затоа, Заев и Шеќеринска прво се трудеа да ги излажат граѓаните дека имало 500 000 фантоми, па 450 000 фантоми, па 300 000 фантоми. На крај манипулациите од СДСМ се сведоа на 30-тина илјади спорни гласачи главно од 5-та и 6-та ИЕ. Меѓу спорните гласачи на СДСМ со кои Заев се обидуваше да ги оправда изборните порази, се најдоа и: Мирјана Најчевска, Гордан Георгиев, Јани Макрадули, Ерол Ризаов,сестрата на Радмила Шеќеринска и многу други членови на СДСМ, кои според логиката на СДСМ не постојат, се вели во реакцијата на ВМРО-ДПМНЕ на изјавата на генералниот секретар на СДСМ Оливер Спасовски.
Целата циркузијада околу фантомите во ,,избирачкиот список”, како што велат од партијата, била со цел да се малтретираат граѓаните со разни процедури во кои тие морале да му докажат на ДИК, според волјата на СДСМ, дека постојат и не се фантоми, за да можат да бидат запишани во Избирачкиот список со што би го оствариле своето уставно право на глас.
– Со приближувањето на изборите, паниката и стравот во редовите на СДСМ се повеќе се зголемуваат. Деструктивната политика која СДСМ ја води целиот овој период, во обид да ја клекне државата на колена, веќе зафаќа патолошка форма. Ваквата деструктивност, која резултира со малтретирање на граѓаните ќе им го донесе 10-тиот изборен пораз во низа, се вели во соопштението од ВМРО-ДПМНЕ.