На СДСМ нема да им успее последното сценарио со кое сака повторно да бара алиби за бегање од избори, за одложување на изборите или за непризнавање на резултатите, реагира ВМРО-ДПМНЕ на денешната изјава на потпретседателот на СДСМ Дамјан Манчевски.
Според ВМРО-ДПМНЕ, на сите им се јасни лагите на СДСМ и измислиците и конструкциите кои оваа партија постојано ги прави, празните изговори и обиди на СДСМ по секоја цена да се саботира функционирањето на државата. На ова, како што се наведува, крајот му доаѓа на 5-ти јуни.
Фантом, како што стои во соопштението на ВМРО-ДПМНЕ, е членот од секое семејство кој што Радмила Шеќеринска и СДСМ излажаа дека ќе го вработат, фантомска е пругата што СДСМ не ја изгради кон Бугарија, фантомска е индустриската зона Сачево во Струмица во која нема ниту трага ниту глас од 3.000 вработувања во 300 капацитети кои ги вети Заев.
– Не се фантоми половината милион Македонци кои не ја поддржуваат политиката на деструкција, манипулација и фабрикување афери на СДСМ, единствената активност на оваа партија со години наназад. Не се фантоми граѓаните кои девет изборни циклуси по ред му ја даваат поддршката на ВМРО-ДПМНЕ кое работи и реализира илјадници реални проекти во интерес на граѓаните и кои доставуваат сметка и казна за СДСМ затоа што освен деструктивните сценарија со кои се труди земјата да биде во континуирана криза, нема што да понуди пред граѓаните, се наведува во соопштението од ВМРО-ДПМНЕ.
