Иако се согласуваме за важноста од побрзото зачленување на Република Македонија во НАТО, сепак, треба да потсетиме дека за македонскиот народ подеднакво е важно задржување на идентитетот, изразен или поврзан со јазикот, националноста и името на земјата.
Ние во ВМРО-ДПМНЕ не планираме по толку многу години борба да се предадеме прифаќајќи уцени и диктати од страна на Грција, ниту закани од каков било вид и од кого било. Нашата борба за македонското прашање е неотповиклива, неприкосновена и безалтернативна и нема цена која ќе не натера да отстапиме од тоа.
Ова се наведува во денешното соопштение од ВМРО-ДПМНЕ лиферувано откако лидерот на ДУИ Али Ахмети неколку пати јавно побара побрзо решавање на спорот со името и со тоа членство во НАТО.
– Со ова соопштение би сакале да му обрнеме внимание на г-динот Али Ахмети дека, иако се согласуваме за важноста од побрзото зачленување на Република Македонија во НАТО, сепак, треба да потсетиме дека за македонскиот народ подеднакво е важно задржување на идентитетот, изразен или поврзан со јазикот, националноста и името на земјата, се вели во текстот.
Ахмети, како што се посочува, добро знае или би требало да знае дека борбата на македонскиот народ за сопствениот идентитет, државност и самостојност, како и проблемите кои Грција ги прави по ова прашање датираат уште од пред повеќе од 170 години, поминувајќи повеќе премрежја, етапи, притисоци, крвопролевања, уништувања, прогони, присилни раселувања, нарушувања на човековите права и обид за уништување, односно бришење на македонската нација.
– Овие обиди продолжија и во последниве 23 години откако Република Македонија доби самостојност како држава. Во тие обиди кои постоеа многу долго пред НАТО да се основа, македонскиот народ даде голема жртва и со загубени животи и со многу маки и малтретирања на Македонците. А и самата земја во овие дваесет и три години издржа многу удари и шокови, од типот на ембарга, блокади и слично, потсетува ВМРО-ДПМНЕ во соопштението.
Ние во ВМРО-ДПМНЕ, се истакнува во соопштението, не планираме по толку многу години борба да се предадеме прифаќајќи уцени и диктати од страна на Грција, ниту закани од каков било вид и од кого било. Нашата борба за македонското прашање е неотповиклива, неприкосновена и безалтернативна и нема цена која ќе не натера да отстапиме од тоа.
– Во тој контекст ВМРО-ДПМНЕ во врвот на своите приоритети го има зацртано зачленувањето на Република Македонија во НАТО и ЕУ, но само под услов тоа да биде паралелно со задржувањето на идентитетот изразен преку формите наведени погоре и со компромис кој не го загрозува тоа и го одобруваат мнозинството граѓани на Република Македонија и македонскиот народ. Г-дин Али Ахмети вели дека сега е време, ние велиме дека секогаш е време, но не по цена на македонскиот идентитет, се наведува во денешното соопштение од ВМРО-ДПМНЕ.