ВМРО-ДПМНЕ во писмената реакција на изјавата на Стево Пендаровски вели дека тој се обиде да дојде на власт, но граѓаните му кажаа дека оној кој ги нарекува „стока“ никогаш нема да ја добие нивната доверба.
– Одговорна власт е онаа која за 10 години отвора 150.000 нови работни места како Владата на ВМРО-ДПМНЕ, наместо да брка 200.000 работници на улица како што направи СДСМ. Одговорна власт е онаа која во државата носи повеќе од 50 директни странски инвестиции како Владата на ВМРО-ДПМНЕ, наместо да има нула реализации како што имаше СДСМ, велат од ВМРО-ДПМНЕ.
Оттаму посочуваат дека одговорна власт е таа која вложува милијарди во инфраструктура, медицинска опрема, субвенции, гради школи, болници, студентски домови, игралишта и спортски сали како Владата на ВМРО-ДПМНЕ.
Одговорна власт е таа која подига плати, пензии и помош како Владата на ВМРО-ДПМНЕ, а не власт која, како што е наведено во реакцијата, немаше воведено ниту минимална плата, кратеше пензии и ги исплаќаше на рати, а зборот покачување не постоеше во нејзиниот речник.
– Затоа на 5-ти јуни СДСМ десетти пат по ред ќе се увери дека за него место во власта на Република Македонија нема. Граѓаните тоа нема да го дозволат, велат од ВМРО-ДПМНЕ.