ВМРО-ДПМНЕ во денешната писмена реакција на прес-конференцијата на Кире Наумов од СДСМ вели дека нему му припаднала срамната задача да го оттргне вниманието од криминалот на Заев.
– СДСМ кој е во заложништво на аболицираниот криминалец Зоран Заев и Кире Наумов во повеќе наврати и нанесоа економски штети на Република Македонија. Предизвикаа криза со која направија потенцијалните инвеститори да се чувствуваат несигурни. Ширеа лаги и невистини за наводна девалвација плашејќи ги граѓаните кои почнаа да ги повлекуваат заштедите и им нанесоа финансиска штета тешка милиони евра. Сега преку своето деструктивно однесување се обидуваат да спречат Република Македонија да дојде до финансиски средства надевајќи се дека ќе ги блокираат исплатите на плати, пензии, социјална помош или инвестирањето во нови училишта, градинки, болници и инфраструктура, се наведува во реакцијата од ВМРО-ДПМНЕ.
Од партијата нагласуваат дека граѓаните, а не криминалците од СДСМ се оние кои кажуваат кој има легитимитет да ја води Македонија, а кој нема легитимитет да зборува за економија.
– Граѓаните знаат дека се додека ВМРО-ДПМНЕ е на власт, Република Македонија ќе продолжи да биде меѓу најниско задолжените земји во Европа, а буџетот нема да завршува во приватни џебови туку ќе се отвораат нови работни места и ќе се реализираат илјадници проекти, велат од ВМРО-ДПМНЕ.