Во струшкото село Горно Татеши вчера се случувала вистинска драма, во која било употребено и автоматско оружје, но за среќа сè минало без ниту една жртва.
М.Т. (39) вчера пријавил дека околу 14.30 часот на местото Долно Тоски, во атарот на Горно Татеши, еден од синовите на неговиот соселанец А.И. испукал неколку рафали со автоматско оружје, но не го погодил.
Полицијата пронашла 14 чаури, како и едно зрно од куршум, кое го пробило седиштето на мотоциклот на М.Т.
При претрес на домот на А.И. полицијата пронашла автоматска пушка без сериски број и една рамка со девет куршуми. При претресот се одземени и една ловна пушка, ловен карабин и пиштол „црвена застава“ М-57, кои А.И. ги поседувал со дозвола.
А.И. и неговите синови Б.И. и М.И. се приведени во полициската станица во Струга. Полицијата работи на целосно расчистување на случајот.